Elen – geafi, muhto goitge nu rikkis

Elena ruovttus lei uksa álo rabas ja gáffe válmmas. Náitalii Peder Jenseniin, Per-Jensain, Reašváris, muhto náittosdilis bisuiga mánáheapmin. Gitta dassážiigo sus jerre áigugo biebmománá.

Ja vel nuppi, ja goalmmáda, ja vel njealjáda. Elen, guhte válddii lusas 18 máná, sihke ruktosis ja váibmosis. Isit lei guolásteaddji ja dállu lea uhci. Oaivvildeigga ahte Min Hearrá háhká sudnuide maid dárbbašeaba vai goitge sáhttiba daguideaskka doaimmahit. Ja doppe lei sadji sihke váimmus ja viesus. Ii duššo gait mánáide, muhto maiddái vuoras ránnjábárrii ja Elena boares váhnemiidda. Elen, guhte maiddái vuosihii liegga váimmus ránnjámánáide, geat muittašedje su vuostábihttá- ja goikebiergomáguin.

Jagis 1938 oaččuiga Elen ja Per-Jensa Gonagasa ánsomedállja silbbas. Eaba lean duššo dahkan máđoheames barggu fuollaolmmožin, muhto dasa lassin lei isit gádjon 12 olbmo heavvaneamis. Iežaska mielas gal eaba orron ánssášeame dan rámi, daningo mielaska leigga duššo dahkan dan mii lea juohke olbmo geatnegasvuohta earáid guovdu. Eaba háliidan boahtit girkui vuostáiváldit medáljaid. Suohkanbáhppa fertii vuolgit sudno ruktui, doallat eahkedismállásiid ja geiget medáljaid.