Søster Helene – suohkana desinfektevra

Helene Sulenga gohčodedje báikegottis «søster Helenen». Jagis 1921 virgáibidjui son searvegotti dearvvašvuođadivššárin Ivgus (fátmmastii Omasvuona, Gáivuona ja Ivggu gitta 1930 rádjái). Jagis 1959 vuostáiválddii Helene Gonagasa ánsomedálja silbbas barggus ovddas maid lei dahkan Ivggu, Gáivuona ja Omasvuona dearvvašvuođadivššus.

Helene Mathea Pedersen Suleng, Dálvvesvággi (1890-1979)

Bohtet go gohččo ja veahkehit gos heahti.
Omasvutnii ja Ivgui ja Gáivutnii don mannet.
Ja dikšot ja jeđđejit gait golmma gillii.
(Olmmáivákki sanitehtasearvi)

Dearvvašvuođadivššára namahusa atnet vuosttaš gearddi jagis 1925, muhto Helene doaimmai duohtadilis danin jo álggu rájes. Virggi ásahedje áiggis go tuberkulosa, dahje «vilges njoammudávda», speajai, ja lei áibbas dárbbašlaš ahte álbmot oaččui dieđuid hygiena dilálašvuođain. Helene veahkehii go skuvllain dagai iskkademiid ja mátkkoštii suohkan birra desinfektevran. Sesttii doaktára guhkes mátkkiin ja suohkana stuora sáhtostangoluin.

Helene hálddašii sihke sámegiela, suomagiela ja dárogiela, ja sáhtii danin gulahallat bures gait olbmuiguin dan máŋggakultuvrrat stuorasuohkanis.

Dearvvašvuođadivššár Helenes lei álohii fárus livsku ja 96% bohtal go olbmuid viesuin manai. Visot masa guoskkai, daid basai bures. Nu maiddái gait viesuid main ledje fuomášuvvon iešguđetlágán njoammumat. Biktasat ja gávnnit biddjoje olggos biggot beaivváža ovdii ja viesuid basse birra.