Hanna – kultuvrralaš guovddáš

Gárnjárgga leansmánnedálus bajásšattai Hanna doalus mii lei ovdamearkan earáide, go das lei eanadoallu, millodoaibma, stámpadoaibma, liidnelikten, kálkaruvke ja dikšunásahus miellabuhcciide.

Hanna Oxaas, náitalan Rivertzan, Ivgumuotki (1861- 1941)

Mánnávuođaruoktu lei kultuvrralaš guovddáš juo ovdal go Hanna náitalii leansmánniin Petter Rivertzeniin ja válddii badjelasas dálu. Muhto Hannain dat eanet vel nanusnuvai, go sus lei garra musihkka- ja kulturberoštupmi. Hanna, guhte šattai ámmát piánočuojaheaddjin ja oahpahii musihkas. Oaččui ollu mánáid ja lei  «rámálmas dállodoalli», geas ledje mánnabiiggát, čorgenbiiggát, gievkkanbiiggát ja reaŋggat. Jagis 1920 álggahii Hanna seaguhuvvon koara mas ledje hárjehallamat ruovttus Gárnjárggas.

Hanna ja isit berošteigga sakka čuvgehusbarggus ja fuolaheigga nu ahte ámtaskuvlla ásahedje Gárnjárgii. Nissonsearvi mas lei fárus huksii uhca buohccivisoža. Son barggai sanitehtasearvvis ja nissonsearvvis. Nissonservviin nagodii čohkket ruđa vai ožžo orgela Ivggu girkui, ja Hanna lei orgelčuojaheaddjin ollu jagiid.