Mary plukker bær. Foto: Reni Jasinski Wright.
Stálubuvru
Sarridat ja joŋat, dat gal ii lean muorjemeastu maid beaivválaččat borre. Lávetmuorjjit ja jerehat, dat gal ledje dušše fal fiinna doaluide ja vahkkoloahpa herskon, danin go dát muorjjit eai lean nu ollu ja dávjá gávdnamis. Mary Helene Pedersen Ivgobađas eret, ráhkada stálubuvrru.
Čakčat čokkiimet murjjiid. Ollu murjjiid. Plásta ii leat vel boahtán adnui, nu ahte mis lei dalle juoga man gohčodedje gávccádas fárppalin. Dat lei muoras dahkkon. Mii vuoššaimet murjjiid sohkkara haga ja seailluheimmet muorjemeastu dákkár fárpaliin. Fárpalat ledje olgovisttis gos vieččaimet muorjemeastu dárbbu mielde. Dalle mis ii lean nu ollu sohkar ahte sáhtiimet olles dievva fárpalii seaguhit sohkkara muorjemestui. Mii baicca sohkkarasttiimet dađistaga go vieččaimet muorjemeastu. Dan fárpalis lei muorjemeastu olles jahkái. Muorjjit bures seilo. Mii eat gossege vásihan guohpa eatge ahte meastu lea geavvagoahtán.
Fat med tyttebær. Foto: Reni Jasinski Wright.
Stálubuvru
Dá leat golbma monnevielgadasa beannot gohpu dievva sohkkarii ja lihtarbeale joŋat. Monnevielgadasa ja sohkkara galggat fierrut dassážiigo suohku. Dasto bijat murjjiid ja joatkit fierrat dassážiigo šaddá fiinna čuvgesrukses ivdni. Dalle lea stálubuvru. Dál sáhttet máŋggas dahkat stálubuvrru birra jagi. Mis lei stálubuvru go joŋat ládde čakčat. Moniid stálubuvrui oaččuimet iežamet vuoncáin. Mun jurddašin daid vuoncáid birra: Dat ledje nu čábbát, dat ledje buotlágan ivnniid seaguhuvvon girjjaga. Mun in muitte ahte mun oidnen vilges vuoncáid ovdal maŋŋil soađi. Vilges vuoncáid gohčodeimmet italialažžan.
Stálubuvru. Foto: Reni Jasinski Wright.
Go mun jurddašan min mánnávuođaáiggi, de mis eai lean goassege negatiivva jurdagat, vaikko mis álot lei ollu maid galggaimet bargat. Dan máid sáhtán dadjat lea: Don it goassege oaidnán olbmuid geat ledje suvrát dahje duhtameahttumat. Dat lea juoga maid máŋgii lean jurddašan. Sii ledje duhtavačča dainna mii sis lei, ja movttegat. Muhto ii lean gal jur buohkain seamma buorre dilli. Dan gal ii lean.
Viežžan girjjis «Syv sorter – historier fra kjøkkenbenken» man Davviálbmogiid guovddáš lea buvttadan ovttas Reni Jasinski Wright:in.
