Helena Mikalsen. Foto: Nord-Troms museum.
Helena - barggánis duodjeveterána
Helena Mikalsen, Olmmáivággi (1905- 1996)
Helena mánnávuođaruovttus gođđojuvvui sihke vealu- ja čuoččostuoluin, ja son beasai árrat oahppat dán barggu. Náitalii Mikaliinnis ja oaččuiga golbma máná moatti jagis. Massii isidis tuberkulosajápmimii go nuoramus mánná ii lean go jahkásaš.
Helena, guhte jur ja jur nagodii beastit dálus bággobidjegis, ja doaimmahii dálu akto mánáidisguin. Ovdal eváhku čihke gođđinstuoluid várrevieltái, muhto maŋŋil vižže daid fas. Helena, guhte lei fárus álggaheame duodjesearvvi. Son lei gaskalađas go gili ullut galge botnimii. Helene, guhte gođii ahte gođii.
Jo, eai beaivvit lean goassege doarvái guhkit, fertejin ijaid váldit veahkkin. Gođđen dávjá gitta biellu guđa rádjái iđidii. De velledasten oanehaš, ovdalgo badjánin ja mannen šibihiid dikšut.
Son gođii vai biebmu bođii beavddi nala. Son gođii filbmejeddjiide ja dutkiide. Son gođii guokte stuora ránu guovtti jándoris vai nagodedje Jan Baalsruda fievrridit dorvvolaččat Ruŧŧii. Son gođii alcces guokte golle gudneduođaštusa duodjeveteránan. Helena gođii stuollogođđinárbevieru historjjás ealli duodjin.
