Vuodjavuoššanrokkit, Árdni
Árdni lea suolu, mii lea Skiervvá gielddas. Dárogillii sullo gohčodit Arnøyan. Árdni lea Norgga vihttanuppelogádin stuorámus suolu.
Lars Erik Normo legger skinn ned i hellegropa.
Ártnis leat ássama mearkkat gitta geađgeáiggi rájes, ja doppe leat ereliiggán ollu kulturmuittut: badjel 450 geađgeáiggi duktásaji, 400 vuodjavuoššanrokki, 20 fanasvistti duktásaji ja gaskkal 10 ja 20 hávddi. Árdne-sullo birastahttet guollás vuonat ja doppe leatge áiggiid čađa guolástan ja bivdán mearranjiččehasaid, nu mo njurjuid ja fálláid.
Vuodjavuoššanrokkiid gávdnat miehtá Davvi-Romssa ja Finnmárkku rittu. Arkeologalaš dutkamušain leat čájehan, ahte rokkiin vušše vuoja njurjo- ja fállábuoiddis.
Vuodjavuoššanrokkit vuhttojit eatnamis guhkedáleš roggin, mat leat buohtalagaid mearain. Bures seilon vuodjavuoššanrokkiin sáhttá oaidnit geađgeravddaid, mat ceaggájit šattuid gaskkas.
Eanaš vuodjavuoššanrokkit leat 2-4 mehtera guhkit (guovttis njeallje mehterii guhkit), 1-2 mehtera govdadat (ovttas guovtti mehterii govdadat) ja 0,3-1 mehtera čiekŋalat (0,3 mehteris gitta 1 mehterii čiekŋalat).
Jagiin 2008 ja 2009 geahččalii Gørill Nilsen, Tromssa universitehta arkeologiija ja sosiálaantropologiija instituhta vuosttašamanuensa, rekonstrueret vuodjavuoššanrokkiid geavahusa árbevirolaš vugiin. Buoremus boađus lei, go son nagodii ráhkadit 30 njurjobuoidekilos oktiivuot 20 lihttera vuoja. Fállábuoidi gal manai eanet juohke vuodjalihttera buvttadeapmái.
Hellegropene – Fornminner fra en funntom periode, Nasjonalbiblioteket
