Riddu Riđđu

Miehta máilmmi eamiálbmogat čoahkkanit juohke geasi mearrasámi gilážii Olmmáivággái Gáivuonas. Riddu Riđđu lea ahtanuššan ja lea šaddan okta dain deháleamos ja mearkkašahtti festiválain Eurohpás.

Riddu Riđđu lea jahkásaš musihkka- ja kulturfestivála mii lágiduvvo Gáivuonas. Musihka, teáhtera, filmma, dáidaga ja girjjálašvuođa bakte háliida festivála čalmmustahttit, ovdánahttit ja hástalit sápmelaččaid ja eará álgoálbmogiid kultuvrra ja gullevašvuođa.

Mearrasámi rámisvuohta
Jagi 1991:s lágiduvvui festivála vuosttaš geardde, dalá lágideapmi gohčoduvvui «Mearrasámi kulturbeaivvit.» Dalá prográmmas lei earret eará šárkabivdu, bassinriemut vákkis, báikkálaš dáidda- ja duodječájáhus ja golbma konseartta sámi ja afrihkálaš artisttaiguin. Lágideaddji dalle lei Gáivuona Sámenuorat/Kåfjord Sameungdom, mii lei sámi nuoraidsearvi, mii lei álggahuvvon jagi ovdal.

Nuorat Gáivuona Sámenuoraid searvvis háliidedje kulturbeivviid bakte čalmmustahttit mearrasámi kulturárbbi, mii nu guhka lei adnojuvvon heahpadin sihke siskkobealde ja olggobealde suohkanrájáid. Dát dáhpáhuvai dan áiggis go vuosteháhku sámevuhtii lei garas ja viiddis, ja digaštallamat gaskkohagaid ledje hui garrasat ja moarrái sihke mediaid bakte ja maiddái priváhta ruovttuin  suohkanis. Musihka, dáidaga ja kultuvrra bakte háliidedje nuorat rievdadit dili heahpatvuođas rámisvuhtii.

Govvateaksta: Plakáhta vuosttaš Riddu Riđu riemuin jagi 1991:s.

Guovddášsajádahkan eamiálbmogiidda
Vaikko sii vásihedje vuostálastima ja heađušteami  de festivála govdodat ja viidodat ahtanušai. Jagi 1995 oaččui festivála nama Riddu Riđđu, ja eanas prográmmadáhpáhusain sirdojuvvojedje olgolávdái. Dovddus sámi artisttat serve festiválii, ja eará davviguovlluid eamiálbmogat serve dađistaga dávjjibut.

Odne lea festivála guovddášsajádahkan eamiálbmogiidda miehtá máilmmi, ja gohčoduvvo okta dain deháleamos festiválain Eurohpás. Festivála čatná oktavuođaid, ásaha ustitlašvuođaid, luohttevašvuođaid ja respeavttaid riikkarájáid ja čearddalašvuođaid gaskkas. Festivála nationála dohkkeheapmi dáhpáhuvai dalle go Riddu Riđđu okta dain 12 festiválain Norggas ožžo guovddášfestivála árvvu, ja ožžot bistevaš doarjaga stáhtabušeahta bakte.

Se dokumentaren Liten storm på kysten, NRK 2001

Fakta om Riddu Riđđu

• Internasjonal urfolksfestival
• Arrangeres hvert år i Manndalen i Kåfjord
• Navnet betyr “liten storm på kysten”
• Står for vennskap og respekt på tvers av kultur og etnisitet