Marita Isobel Solberg

Marita Isobel Solberg Gáivuonas eret, lea máŋggabealat musihkkár ja dáiddár, guhte sehkke sihke sámi, davvi kultuvrra ja subkultuvrraid elemeanttaid barggustis.

Marita Isobel Solberg bajásšattai Olmmáivákkis Davvi-Romssas, gilli gos sámegiella, kvenagiella, ja dárogiella leat eallán bálddalaga ja gos Riddu Riđđu-festivála moanat logiid jagiid lea leamaš deaivvadanbáiki kultuvrraide iešguđet sajiin miehtá máilmmi.
Dat vuhtto su musihkas, perfomancain (ovdanbuktimiin), ráhkadusain, govain ja videoin. Sehkkedettiinis elemeanttaid sihke sámi, davvi ja subkultuvrrain, gaskkusta son earret eará muitalusaid, jienaid, hájaid, deaivvademiid ja oktiinordademiid gaskal olbmuid ja báikkiid. Su dáidda čilgejuvvo leat burleskan (roavva leaikan), ekspressiivan (dovddaheaddjin), sarkástalaš (bilkideaddjin) ja ekstáhtalaš (ilusmahtti) .

Hástala gehččiid

Bajásšattadettiinis Gáivuonas oahpásmuvai Solberg árrat materiálaiguin ja objeavttaiguin mat ledje čadnojuvvon lundui, giehtabargui/duodjái ja áigodagaide čadnojuvvon bargguide. Son oahpai árrat tevdnet, gođđit, čuoldit ja bargat muorain ávnnasin. Barggustis geavaha son materiálaid nugo ullu, láirrá, čázi, dáiggi, sámmála, ja go bidjá govaid, jienaid, čuovgga, videoid ja muitalusaid daidda lassin, ráhkada son fámolaš, šattolaš ráhkadusaid.

Performance (Ovdanbuktin) lea deaŧalaš oassi Solberga barggus. Garra searvevuođain, almmuha son lihkademiiguin, hájaiguin, jienaiguin ja lávlumiin, ja hástala gehččiidis guldalit, haksit, guorahallat ja diđoštit.

Ieš lohká Solberg ahte son bargá rádjemáilmmis gaskal dáidaga, eallima ja diehtaga, Son háliida doalvut gehččiidis mátkái miellagovahalli, filosofalaš ja metaforalaš máilbmái, gos sáhttá dutkat iežas siskkimučča ja govahallat earret eará oktavuođaid, luonddu ja rupmaša doaimmaid.

Čájáhusa En usunget sang (Lávllokeahtes lávlaga), rahpamis, Davvi álbmogiid guovddáš.Govva: Ørjan Marakatt Bertelsen

Iešguđetlágan musihkalaš šáŋŋerat

Solberg váldigođii lávlundiimmuid go lei 7 jahkásaš, ja lea geahččalan olu iešguđetlágan musihkalaš šáŋŋeriid, earret eará popa, rocka, jazza ja soula. Mara & The Inner Strangeness lea leamaš Solberga váimmu guovdu prošeakta, konseapta mas leat musihkka, ráhkadusat,  perfomancat (ovdanbuktimat) ja dáidda. Joavku jođii sihke riikka siste ja olgoriikkas, ja almmuhii sihke ep ja albuma Red Sounds Whisper.

Odne johttá Solberga joavkkuin MmmMaras. Joavku ráhkada ođđa geahččaleaddji popa mas iská ođđa jietnaeanadagaid ja visuála effeaktaid.

Nationála ja riikkaidgaskasaš doaimmaid

Solbergas lea mastergráda Oslo dáiddaallaskuvllas (2007). Son ássá Romssas, muhto lea álo jođus, sis- ja olgoriikkas, čájáhusaiguin ja ohcat inspirašuvnna. Deaivideamit iešguđetlágan olbmuiguin, kultuvrraiguin ja ságastallamat ja digaštallamat, leat deaŧaleamos masa sáhttit geavahit áigámet Solberg oainnu mielde.The Watermill Center i NY (Robert Wilson), Art & Life Institute Kingstonas, New Yorkas, Fordypningsrommet Fleinværas (2017) ja Pushkinskaya. 10 Art Center St. Petersburgas, Ruoššas, leat dušše muhtin báikkit gos sus leat leamaš čájáhusat. Maŋemus jagiid leat sus leamaš olu barggut dan riikaoasis, earret eará Sámi Dáiddamusea  direktevran ja performancedáiddárin (2017), maid Jérémie McGowan kuraterii Nordnorsk Kunstmuseuma (Davvinorgga Dáiddamusea) ovddas. Musea oaččui dan vuođul dan jagáš musea bálkkašumi.