Agnes Eriksen
Agnes Eriksenin lastenkirjat Kummitus ja tähtipoika olthiin ensimäiset kuvakirjat missä oon sekä norjan- ja kvääninkieliset tekstit. Eriksen oli kans toinen niistä kekkä saathiin ensimäisen Kväänin kielipalkinon.
Agnes Eriksen. Foto: Privat
Teksti: Kaisa Maliniemi
Agnes Eriksen oon syntyny Mouruniemessä Porsangin komuunissa. Hän työteli monta vuotta opettajana Lemmijoven lastenkoulussa. Hän oon aijemin antanu ulos kirjan Piu pau paukkuu (2003) missä oon kvääninkielisiä riimiä ja loruja. Hän oon kirjottannu kans kväänin kielen oppikirjoja. Agnes Eriksen sai ensimäisen Kväänin kielipalkinon yhessä Eira Söderholmin kans vuona 2017.
Kummitus ja Tähtipoika/Spøkelset og Stjernegutten
Kummitus ja Tähtipoika/ Spøkelset og Stjernegutten 1 ja 2 tulthiin ulos syksylä 2011. Net oon ensimäiset kuvakirjat missä oon sekä norjan- ja kvääninkieliset tekstit. Kirjat olthiin valmhiit jo
Spøkelset og stjernegutten 1
monen vuoen aijan, mutta niitä ei saattanu antaat ulos ko ei ollu rahhaa sitä varten. Se ette ei ole rahhaa, oon ollu probleemi kväänilitteratuurissa. Viimen kirjat saathiin finansieeringin vuona 2011.
Kummitus ja Tähtipoika/Spøkelset og Stjernegutten oon lastenkirjat joissa inspirasjuuninna oon karu Pohjas-Norja ja sen fierua ja kivet. Kirjan tapahtumat oon paikassa minkä nimi oon Kivikylä. Kirjan muisteluksissa oon myötä kaikki vuoenaijat. Fieruassa kohtaama siivon kummituksen jonka tykönä kylästellee hänen ystävä, Tähtipoika. Pääpersoona ja figuurit oon kiviä, kiviformasjuunia, kasvuja ja jääskulptuuria joita luonto itte oon luonu. Kirjailija oon itte kuvanu kirjan kuvat. Kieli oon kuitenki sen verran helppoa ette lapset jaksava kuunela muisteluksen.
Kesälä 2017 annethiin ulos kolmanen Kummitus ja tähtipoika-kirjan.
